FC Prishtina në Superligën e Shqipërisë ?

FC Prishtina ka dërguar kërkesë zyrtare në institucionet më të larta sportive dhe shtetërore të Shqipërisë.

Kampioni i tetëfishtë kosovar ka një ide tejet interesante e cila në rast se realizohet do të ndihmonte futbollin tonë që të fillojë daljen nga kriza e cila po zgjat për më tepër se dy dekada. FC Prishtina ka kërkuar që prej edicionit të ardhshëm të bëhet pjesë e elitës së futbollit në kampionatin e Shqipërisë.

Këtë lajm e ka konfirmuar Presidenti i FC Prishtina, Remzi Ejupi. “Po, e vërtetë është, kërkesa jonë I është dërguar institucioneve më të larta në Shqipëri, unë vetë isha i pranishëm atje, zhvillova disa takime me rëndësi dhe besoj se ato do të vazhdojnë, unë mendoj se veç Prishtinës në kampionatin shqiptar duhet të bëjë pjesë edhe një skuadër tjetër kosovare e cila ka kushte të volitshme për të ecur përpara dhe për të dalë nga kjo krizë që nuk po na lëshon ” tha Ejupi.

Kryesia bardh e kaltër tanimë ka bërë një lëvizje përpara duke sjellur trajnerin gjerman Wolfgang Jerat, por duket se kjo lëvizje është e vogël për ato të cilat mund të pasojnë, transmeton korneri.

S.Metbala / lajmesport.com